Në 26-vjetorin e zhdukjes së profesorit, politikanit dhe mendimtarit të njohur shqiptar, Ukshin Hoti, kryeministri në detyrë i Kosovës, Albin Kurti, ka përkujtuar figurën e tij duke sjellë në vëmendje dokumente të rëndësishme dhe dëshmi për rrethanat e zhdukjes së tij nga autoritetet serbe më 16 maj 1999.

Në një postim në rrjetet sociale, Kurti ka përshkruar me hollësi ngjarjet që çuan në zhdukjen e Hotit.

Kryeministri ka publikuar edhe dokumentin zyrtar të lirimit të Hotit me numër protokolli 24-2241-05, të nënshkruar nga drejtori i burgut, Aleksandër Rakoçeviq.

Kurti e cilësoi datën 16 maj 1999 jo si një ditë çlirimi, por si një ditë dhimbjeje: “16 maji i vitit 1999, dita e lirimit të Ukshin Hotit nuk ishte dita e daljes së tij në liri, por dita e zhdukjes së tij.”

Ai kujtoi gjithashtu masakrën që pasoi në Burgun e Dubravës, duke e cilësuar si një tjetër krim shtetëror të Serbisë ndaj shqiptarëve.

“Mungesa e veprimit nga Prokuroria Speciale e Kosovës mbetet boshllëk i dhimbshëm në përpjekjen tonë kolektive për drejtësi dhe për të vërtetën. Institucionet tona të drejtësisë e kanë obligim moral dhe kushtetues që të veprojnë me përgjegjësi, për të mos lejuar që harresa ta zëvendësojë drejtësinë. Republika e Kosovës kërkon zbardhjen e plotë të rastit të zhdukjes së Ukshin Hotit dhe drejtësi për të, sikur edhe për të gjithë të zhdukurit e tjerë me dhunë. Politikani e profesori Ukshin Hoti do të mbetet një nga figurat më të rëndësishme të historisë së Kosovës e unike të mendimit politik shqiptar”, tha ai.